கூடலூர்:
தேனி மாவட்டம், கூடலூரில் மின்வாரிய அலுவலகம் கடந்த 2011-ம் ஆண்டு முதல் காந்திகிராமம் பகுதியில் உள்ள தனியார் கட்டிடத்தில் இயங்கி வந்த நிலையில் கடந்த 2013-ல் கட்டிட உரிமையாளர் இந்த இடம் சொந்த பயன்பாட்டுக்கு வேண்டும் எனக்கூறி மின்வாரிய அலுவலகத்தை காலி செய்யக்கோரி நோட்டீஸ் அனுப்பி உள்ளார். அதிகாரிகளும் மின்வாரிய அலுவலகத்தை மாற்ற பல முறை தவணைகேட்டு இருந்தனர். இருப்பினும் அலுவலகத்தை மாற்ற அதிகாரிகள் காலம் தாழ்த்தி வந்ததாக கூறி கட்டிட உரிமையாளர் கடந்த 20-ம் தேதி (வெள்ளிக்கிழமை) அலுவலகத்தை பூட்டினார்.
இதனால் பணிக்கு வந்த மின்வாரிய அதிகாரிகள் மற்றும் ஊழியர்கள் அலுவலகத்திற்கு உள்ளே செல்ல முடியாமல் வெளியே தவித்தனர். பொதுமக்களும் அலுவலகம் பூட்டிக் கிடந்ததால் மின் கட்டணம் செலுத்த முடியாமல் அவதியடைந்தனர். பின்னர் இது குறித்து மின்வாரிய உயர் அதிகாரிகள் கட்டிட உரிமையாளாருடன் பேச்சு வார்த்தை நடத்தினர். அப்போது 3 நாட்களுக்குள் அலுவலகத்தை மாற்றி கட்டிடத்தை உரிமையாளரிடம் ஒப்படைப்பதாக உறுதிமொழி அளித்தனர். இதைத் தொடர்ந்து நேற்று முதல் மேலக்கூடலூர் 16-வது வார்டு வாட்டர் டேங் தெருவில் உள்ள புதிய கட்டிடத்திற்கு மின் வாரிய அலுவலகம் இடமாற்றம் செய்யப்பட்டுள்ளது.
எனவே, கூடலூர் நகர பொதுமக்கள் அனைவரும் பயன் அடையுமாறு மின்வாரிய உதவி பொறியாளர் பாண்டியன் தெரிவித்து உள்ளார். #Powerboardoffice
